5 ສູດລັບຈາກໝາກນາວທີ່ຈະເຮັດໃຫ້ທ່ານງາມໃສ

5 ສູດລັບຈາກໝາກນາວທີ່ຈະເຮັດໃຫ້ທ່ານງາມໃສ

ໝາກນາວເປັນຜັກໝາກໄມ້ທີ່ຈະຕ້ອງມີກັນທຸກບ້ານເພາະຈຳເປັນຕ້ອງໃຊ້ໃນການປະກອບອາຫານຫຼາຍຊະນິດ ແຕ່ທ່ານຮູ້ຫຼືບໍ່ວ່າໝາກນາວ ໜ່ວຍນ້ອຍໆນີ້ແລະທີ່ຈະເຮັດໃຫ້ທ່ານມີສຸຂະພາບທີ່ດີໄດ້ບໍ່ວ່າຈະເປັນການນຳມາດື່ມເພື່ອສຸຂະພາບຫຼືຈະນຳມາບຳລຸງຜິວກາຍເພື່ອຄວາມສວຍ ງາມໄດ້ເຊັ່ນກັນແຖມຍັງບໍ່ມີສານເຄມີແລະຍັງປະຢັດເງິນໃນກະເປົາອີກດ້ວຍຮູ້ແບບນີ້ແລ້ວມາຟີນໄປກັບ 5 ວິທີຈະເຮັດໃຫ້ທ່ານງາມໃສກັນດີ ກວ່າ

1. ແກ້ປັນຫາສົບແຕກແຫ້ງ

ທ່ານຄົງຍັງບໍ່ເຄີຍຮູ້ມາກ່ອນແນ່ນອນວ່າໝາກນາວກໍ່ເຮັດໃຫ້ປາກຊຸ່ມຊື່ນໄດ້ແຖມຍັງແກ້ປັນຫາສົບແຕກແຫ້ງໄດ້ດີອີກດ້ວຍບໍ່ມີຫຍັງທີ່ຈະຫຍຸ້ງຍາກເເລີຍພຽງແຕ່ທ່ານນຳນ້ຳໝາກນາວມາທາຮີມສົບກ່ອນນອນທຸກຄືນເມື່ອທ່ານຕື່ນຂຶ້ນມາປາກຂອງທ່ານກໍ່ຈະຊຸ່ມຊື່ນສົດໃສແຕ່ທາເບົາໆກໍ່ພໍ

2. ກຳຈັດສິວຫົວດຳໄດ້ຜົນສຸດໆ

ຮູ້ບໍ່ໝາກນາວຊ່ວຍກຳຈັດສິວຫົວດຳໄດ້ຄືກັນພຽງແຕ່ເອົາໝາກນາວມາຝານເປັນປ່ຽງ ນ້ອຍໆແລ້ວເອົາມາທາບໍລິເວນທີ່ເປັນສິວປະໄວ້ປະມານ 10 ນາທີແລ້ວຈຶ່ງລ້າງອອກແຕ່ທ່ານຕ້ອງຫ້າມອອກແດດເພາະຈະເປັນຈຸດດ່າງດຳໄດ້ເນື່ອງຈາກໝາກນາວອາດເຮັດໃຫ້ຜິວໜ້າຂອງເຮົາບາງ ໄປຊ່ວງໜຶ່ງ

3. ຂີ້ແຮ້ຂາວໃສດ້ວຍໝາກນາວ

ໜັກໃຈເມື່ອເຫັນຂີ້ແຮ້ໂຕເອງດຳແຕ່ຕໍ່ໄປນີ້ຍິ້ມແບບງາມໆໄດ້ເລີຍແຄ່ເອົານ້ຳໝາກນາວ ເຂົ້າໂອດແລະນ້ຳເຜິ້ງພຽງເລັກນ້ອຍນຳມາປະສົມ ກັນແລ້ວນຳມາທາທີ່ຂີ້ແຮ້ປະໄວ້ 1 ຊົ່ວໂມງຂີ້ແຮ້ຂອງທ່ານກໍ່ຈະຂາວຂື້ນທັນທີແຖມຍັງເບິ່ງ ລຽບນຽນໂດຍບໍ່ຕ້ອງໃຊ້ໂລອອນເລີຍ

4. ສູດຜົມງາມດ້ວຍໝາກນາວ

ບໍ່ເຊື້ອກໍ່ຕ້ອງເຊື້ອແລ້ວຜົມງາມເຫຼືອມແບບບໍ່ຕ້ອງເຮັດທຣີດເມັ້ນຜົມກັນເລີຍພຽງແຕ່ທ່ານເອົານ້ຳໝາກນາວມາພົມທີ່ຜົມໃຫ້ທົ່ວແລ້ວອອກໄປນອກບ້ານໃຫ້ຜົມທ່ານໄດ້ຖືກແສງແດດຜົມທ່ານກໍ່ຈະສະຫວ່າງໃສເງົາງາມທັນທີເຮັດພຽງແຕ່ອາທິດລະຄັ້ງກໍ່ຈະໄດ້ຜົມທີ່ສະຫວ່າງໃສຢ່າງແນ່ນອນແຖມຍັງກຳຈັດລັງແຄໄດ້ອີກດ້ວຍ

5. ຄວບຄຸມຄວາມມັນໃບໜ້າ

ທ່ານເປັນສາວເລື່ອງຫຼາຍຢູ່ແມ່ບໍ່ໃຊ້ເຄື່ອງສຳອາງໂຕໃດກໍ່ບໍ່ຖືກໃຈຈັກເທື່ອລອງນີ້ເລີຍນ້ຳໝາກນາວພຽງແຕ່ເອົານ້ຳໝາກນາວມາທາທີ່ໃບໜ້າກ່ອນນອນທຸກຄືນຄວາມມັນກໍ່ຈະຫຼຸດລົງຢ່າງຊັດເຈນແຕ່ກໍ່ອາດຈະເຈືອຈາງນ້ຳໝາກນາວກ່ອນຈັກໜ້ອຍກໍ່ໄດ້ໂດຍນຳນ້ຳໝາກນາວມາປະສົມກັບນ້ຳດື່ມໜ້ອຍໜຶ່ງເພື່ອປ້ອງກັນການແພ້ສຳຫຼັບບາງຄົນ

ຂອບໃຈຂໍ້ມູນຈາກ: ມະນີລາດ ອອນລາຍ

ປ່ຽນພຶດຕິກຳ ຊີວິດປ່ຽນ

ຕະຫຼອດໄລຍະປີຜ່ານມາ ທ່ານເຄີຍຕັ້ງເປົ້າໝາຍຫຍັງແນ່ໃນຊີວິດ? ແນ່ນອນ ຫຼາຍຄົນກໍມີເປົ້າໝາຍຂອງແຕ່ລະຄົນທີ່ແຕກຕ່າງກັນໄປ, ບາງຄົນກໍບັນລຸເປົ້າໝາຍ ແລະບາງຄົນກໍລົ້ມເຫຼວ.

ສາເຫດແຫ່ງຄວາມລົ້ມເຫຼວ ສ່ວນໃຫຍ່ມາຈາກບັນຫາລຸ່ມນີ້ຄື:

1.    ບໍ່ມີວິໄນບັງຄັບຕົນເອງ

2.    ມັກລັ້ງລໍ ບໍ່ຕັດສິນໃຈລົງມື້ເຮັດ

3.    ມັກຂີ້ຄ້ານ

4.    ບໍ່ຮັກໃນວຽກທີ່ຕົນເອງເຮັດ

5.    ຂາດການເອົາໃຈໃສ່ຈິງຈັງ

6.    ຂາດຄວາມເຊື່ອໝັ້ນຕົນເອງ

7.    ຂາດແຮງບັນດານໃຈ

8.    ເປົ້າໝາຍບໍ່ຊັດເຈນ.

ເພື່ອຈະປະສົບຜົນສຳເລັດໄດ້ ຈະຕ້ອງໄດ້ທຸ້ມເທແກ້ໄຂພຶດຕິກຳການດຳເນີນຊີວິດຂອງຕົນເອງ ໃຫ້ອອກມາຈາກວັງວົນແຫ່ງສາເຫດແຫ່ງຄວາມລົ້ມເຫຼວ 6 ຂໍ້ນັ້ນຄື:

1.    ຕ້ອງມີລະບຽບວິໄນຄວບຄຸມພຶດຕິກຳຂອງຕົນເອງ

2.    ວາງແຜນແລ້ວຕ້ອງລົງມືເຮັດໃຫ້ໄດ້

3.    ສ້າງນິໄສແຫ່ງການຮັກວຽກຂອງຕົນ

4.    ດຸໝັ່ນຂະຫຍັນພຽນ

5.    ເອົາໃຈໃສ່ບໍລົດລະຄວາມພະຍາຍາມ

6.    ປຸກຄວາມເຊື່ອໝັ້ນໃນໃຈໃຫ້ເກີດຂຶ້ນ

7.    ສ້າງແຮງບັນດານໃຈ ຫຼືຊອກຫາຄົນທີ່ເປັນແຮງບັນດານໃຈ

8.    ມີເປົ້າໝາຍຊີວິດທີ່ຊັດເຈນ.

ຖ້າບຸກຄົນໃດປະຕິບັດຕາມ 8 ຂໍ້ສຸດທ້າຍນີ້ໄດ້ ແນ່ນອນວ່າ ຈະປະສົບຜົນສຳເລັດໃນຊີວິດໂດຍບໍ່ຕ້ອງສົງໄສ.

ຜົນການວິໄຈເຜີຍ ຜູ້ຍິງທີ່ມັກຈົ່ມ,ອາລົມເສຍ ສາມາດເປັນແມ່ທີ່ດີຂອງລູກໄດ້

ເປັນອີກໜຶ່ງບົດຄວາມນ່າອ່ານ ທີ່ໃຫ້ແງ່ຄິດມຸມມອງດີໆ ສຳຫລັບໃຜບອກວ່າການມີເມຍມັກຈົ່ມ ເປັນເລື່ອງທີ່ບໍ່ດີ ເພາະແທ້ຈິງແລ້ວ ເມຍທີ່ດີສ່ວນໃຫ່ຍ ສ່ວນຫລາຍຄົນເປັນເມຍທີ່ມັກຈະອາລົມເສຍ ແຕ່ແທ້ຈິງແລ້ວການເລືອກຄົນຮັກທີ່ດີນັ້ນ ບໍ່ໄດ້ເບິ່ງທີ່ອາລົມເສຍແຕ່ຕ້ອງມາເບິ່ງທີ່ຢ່າງອື່ນຫລາຍກວ່າ

ຜູ້ຊາຍເຮົາທັ້ງຫລາຍເຄີຍຄິດບໍ່ວ່າ ເປັນຫຍັງຄົນຮັກຂອງເຮົານັ້ນ ມັກອາລົມບໍ່ດີຢູ່ເລື້ອຍໆ ແລະ ເຊື່ອບໍ່ວ່າໃນເວລາທີ່ເຮົາເລືອກຄົນຮັກທີ່ດີນັ້ນຄວນເບິ່ງຈາກຫຍັງ

ມີຄຳກວ່າວ່າ: ການເບິ່ງຫາເມຍຕ້ອງຫາຜູ້ຍິງທີ່ມັກ “ອາລົມເສຍວີນໃສ່” ເພາະວ່າຜູ້ຍິງທີ່ບໍ່ເຄີຍອາລົມເສຍ ຫລື ວີນໃສ່ ກໍ່ຄື “ນ້ຳລ້າ” ແກ້ວໜຶ່ງ ສາມາດັບກະຫາຍໄດ້ ແຕ່ບໍ່ມີລົດຊາດ

ດັ່ງນັ້ນຜູ້ຍິງທີ່ມີ ” ອາ ລົມ ເສຍ” ກໍ່ປຽບຄືກັບເຫລົ້າ ທັ້ງນ່າຕື່ນເຕັ້ນແລະນ່າຈົດຈຳຫລາຍ ແຕ່ໃນຄວາມເປັນຈິງນັ້ນ ການທີ່ລາວອາລົມເສຍກໍ່ເພື່ອເຈົ້າແທ້ໆ ໃຫ້ລອງຄິດເບິ່ງ ເມື່ອຕອນທີ່ເຈົ້າມາຊ້າ ລາວຈະຄຽດ ເພາະເປັນເພາະລາວກັງວົນ

ຢ້ານວ່າຈະເກີດສິ່ງທີ່ບໍ່ຄາດຄິດຂຶ້ນກັບເຈົ້າ ເມື່ອເຈົ້າບໍ່ເບິ່ງແຍງຕົວເອງ ຈະວີນໃສ່ ເປັນເພາະລາວເປັນຫ່ວງສຸຂະພາບຂອງເຈົ້າ ເມື່ອເຈົ້າດື່ມ ລາວຈະອາລົມເສຍ ເປັນເພາະລາວຢ້ານວ່າຈະບໍ່ມີໃຜເບິ່ງແຍງເຈົ້າ ແລະ ຢ້ານວ່າຈະມີເລື່ອງບໍ່ດີເກີດຂຶ້ນກັບເຈົ້າ

ເມື່ອເຈົ້າບໍ່ມັກອາບນ້ຳ ລາວຈະຮ້າຍຫລາຍ ເປັນເພາະລາວຫວັງວ່າເຈົ້າຈະມີວິຖີຊີວິດທີ່ສະອາດ ແລະ ສາມາດມີສຸຂະພາບທີ່ດີໄດ້ ເຖິງເຈົ້າຈະຟັງສຽງຂອງລາວເປັນພຽງແຕ່ລົມພັດ ລາວຈຶ່ງຕ້ອງອາລົມເສຍໃສ່ເຈົ້າ ເພື່ອຫວັງວ່າເຈົ້າຈະຈື່ຈຳເລື່ອງເຫລົ່ານັ້ນໄວ້ໃນໃຈແລະຕັ້ງໃຈເຮັດມັນຢ່າງຈິງຈັງ

ແຕ່ເຈົ້າເຮັດຕົວຫຍຸ້ງຢູ່ສະເໝີ ລາວກໍ່ຈະອາລົມເສຍໄດ້ງ່າຍ ກໍ່ເປັນເພາະວ່າບໍ່ມີຄົນຄອຍຢູ່ຄຽງຂ້າງ ເວົ້ານຳກັນ ກອດແລະຫອມລາວ ເຮັດໃຫ້ລາວຮູ້ສຶກວ່າກຳລັງຖືກລະເລີຍ

ເມື່ອເຈົ້າລືມວັນສຳຄັນຕ່າງໆຂອງລາວແລະເຈົ້າ ລາວຈະຄຽດຫລາຍ ລະວັງເລື່ອງນີ້ໄວ້ໃຫ້ດີ ເພາະວ່າຄວມຮູ້ສຶກຂອງລາວນັ້ນລະອຽດອ່ອນຫລາຍຖ້າທຽບໃສ່ກັບອາລົມຂອງລາວແລ້ວ ລາວເປັນຄົນມັກເກັບຄວາມຮູ້ສຶກມາຄິດ ແລະ ທຸກໃຈຢູ່ຄົນດຽວ.

ສາມີຄົນໃດທີ່ຖືກພັນລະຍາດ່າເລື້ອຍໆ ຢ່າຟ້າວນ້ອຍໃຈເດີ ເພາະຫາກເຂົາເປັນແມ່ທີ່ດີ ເບິ່ງແຍງເຈົ້າຢ່າງ ເຈົ້າກໍ່ເປັນສາມີທີ່ໂຊກດີຫລາຍທີ່ສຸດແລ້ວ.

ຄວາມເປັນມາຂອງບຸນມາຄະບູຊາ

– ຄຳວ່າ ມາຄະບູຊາ ແມ່ນຊື່ຕາມດາວຣືກໜຶ່ງໃນຊາວ ໒໗ ດວງທີ່ພົວພັນກັບໂລກ ມີຊື່ວ່າ “ມາຄະ” ຄຳວ່າ “ບູຊາ“ແປວ່າໄຫວ້ ກໍໝາຍວ່າ ການທຳບຸນ ໄຫວ້ພຣະໃນວັນມາຄະ ໃນພາສາລາວແທ້ຮຽກວ່າ ເດືອນວສາາມເພັງ ຄຳວ່າເພັງ ອັນໝາຍເຖິງວັນພຣະຈັນເຕັມດວງ ໃນວັດ ທະນະທັມລາວວັນນີ້ ບາງຄັ້ງກໍວ່າວັນບຸນເຂົ້າຈີ່, ຄືຊາວພຸດຈະເອົາເຂົ້າຈີ່ມາໃສ່ບາດພຣະສົງ, ບາງທ້ອງຖິ່ນ ເຊັ່ນທາງຈຳປາສັກຮຽກວ່າ ບຸນເດືອນ ໓ ເພັງ, ບຸນກຸ້ມເຂົ້າ ຫຼືບຸນກອງເຂົ້າ, ບຸນວັດພູເປັນຕົ້ນ.

ຫຼັງຈາກທີ່ພຣະພຸດທະເຈົ້າຕັດສະຮູ້ມາໄດ້ 9 ເດືອນແລ້ວ ວັນໜຶ່ງກົງກັບວັນຂຶ້ນ 15 ຄ່ໍາເດືອນ 3 (ວັນມາຄະບູຊາ) ເຊິ່ງທາງສາດສະໜາພຼາມ ຖືວ່າເປັນວັນລອຍບາບ ຮຽກວ່າ ສີວະຣາຕີ

ວັນນັ້ນ ອົງສົມເດັດພຣະສຳມາສຳພຸດທະເຈົ້າ ທຼົງປະທັບຢູ່ນະເວລຸວະນາຮາມ(ວັດປ່າໃຜ່) ໃນຕອນບ່າຍພິກຂຸສາວົກຈຳນວນ 1250 ຮູບ ເຊິ່ງລ້ວນແຕ່ເປັນພຣະອໍຣະຫັນຂີນາສົບ ໄດ້ເດີນທາງມາທີ່ວັດນີ້ໂດຍບໍ່ໄດ້ນັດໝາຍກັນໄວ້ກ່ອນໜ້າເລີຍ ອັນເປັນເຫດການທີ່ໜ້າອັດສະຈັນແລະຫາຍາກການປະຊຸມຂອງພຣະສົງໃນວັນນັ້ນເອີ້ນວ່າ ຈາຕຸລົງຄະສັນນິບາດ ເພາະເປັນການປະຊຸມອັນປະກອບດ້ວຍອົງສີ່ຄື:

1.ເປັນມື້ເພັງເດືອນສາມພະຈັນສະເຫີວຍມາຄະລຶກ

2.ພຣະພິກຂຸຈຳນວນ 1250 ຮູບມາປະຊຸມພ້ອມກັນໂດຍບໍ່ໄດ້ນັດໝາຍ

3.ພຣະພິກຂຸເຫຼົ່ານັ້ນລ້ວນແຕ່ເປັນພຣະອໍຣະຫັນ ໄດ້ອະພິນຍາ 6

4.ພຣະພິກຂຸເຫຼົ່ານັ້ນລ້ວນແຕ່ເປັນພຣະທີ່ພຣະພຸດທະເຈົ້າບວດໃຫ້ທັງໝົດ(ເປັນເອຫິພິກຂຸອຸປະສຳປະທາ)

ໃນການປະຊຸມຄັ້ງນີ້ພຣະພຸດທະເຈົ້າໄດ້ສະແດງໂອວາທະປາຕິໂມກ ອັນເປັນຫຼົກຄຳສອນທີ່ເປັນຫົວໃຈທາງພຣະພຸດທະສາດສະໜາໂດຍຕັດເປັນພຼະຄາຖາດັ່ງນີ້

ສັພພະປາປັສສະ ອະກະຣະນັງ, ການບໍ່ເຮັດບາບທັງປວງ (ລະຊົ່ວ)

ກຸສະລັສສູປະສັມປະທາ, ການກະທຳກຸສົນໃຫ້ເຖິງພ້ອມ (ເຮັດດີ)

ສະຈິຕຕະປະຣິໂຍທະປະນັງ, ການຊຳລະຈິດຂອງຕົນໃຫ້ບໍຣິສຸດຜ່ອງໃສ

ເອຕັງ ພຸທທານະສາສະນັງ, ທັມ 3 ຢ່າງນີ້ເປັນຄໍາສັງສອນຂອງພຣະພຸດທະເຈົ້າທັງຫຼາຍ

ຂັນຕີ ປາຣະມັງ ຕະໂປ ຕີຕິກຂາ, ຂັນຕິຄືຄວາມອົດທົນ ອົດກັ້ນ ເປັນເຄື່ອງເຜົາກິເລດຢ່າງຍິ່ງ

ນິພພານັງ ປະຣະມັງ ວະທັນຕິ ພຸທທາ, ຜູ້ຮູ້ທັງຫຼາຍກ່າວພຼະນິບພານວ່າເປັນທັມອັນຍິ່ງ

ນະ ຫິ ປັພພະຊິໂຕ ປະຣູປະຄາຕີ, ຜູ້ກຳຈັດສັດອື່ນຢູ່ບໍ່ຊື່ວ່າເປັນບັນພະຊິດເລີຍ

ນະ ສະມະໂນ ໂຫຕິ ປະຣັງ ວິເຫຖະຍັນໂຕ,ຜູ້ກະທຳສັດອື່ນໃຫ້ລຳບາກຢູ່ບໍ່ຊື່ວ່າເປັນສຳມະນະເລີຍ

ອະນູປະວາໂທ ອະນູປະຄາໂຕ, ການບໍ່ເວົ້າຮ້າຍ ການບໍ່ທໍາຮ້າຍ

ປາຕິໂມກເຂ ຈະ ສັງວະໂຣ, ການສຳລວມໃນປາຕິໂມກຂ໌

ມັຕຕັນຍຸຕາ ຈະ ພັດຕັສມິງ, ຄວາມເປັນຜູ້ປະມານໃນການບໍລິໂພກ

ປັນຕັນຈະ ສະຍະນາສະນັງ, ການນອນ ການນັ່ງໃນທີ່ອັນສະຫງົບ

ອະທິຈິຕເຕ ຈະ ອາໂຍໂຄ, ຄວາມໝັ່ນປະກອບໃນການທຳຈິດໃຫ້ບໍຣິສຸດຍິ່ງ

ເອຕັງ ພຸທທານະສາສະນັງ, ທັມ 6 ຢ່າງນີ້ເປັນຄຳສັງສອນຂອງພຣະພຸດທະເຈົ້າທັງຫຼາຍ

ຂໍ້ຄວາມໃນໂອວາທະປາຕິໂມກຂ໌ນີ້ ບາງຂໍ້ກໍ່ສະເພາະພຣະສົງ ບາງຂໍ້ກໍ່ນຳໄປປະຕິບັດໄດ້ທັງພຣະແລະຊາວບ້ານ

ໂອວາທະປາຕິໂມກນີ້ ເປັນຫຼັກຄຳສອນຂອງພຣະພຸດທະສາສະໜາ ອັນເປັນໄປເພື່ອປ້ອງກັນ ແລະແກ້ໄຂປັນຫາຕ່າງ ໆ ໃນຊີວິດ ແລະເພື່ອຄວາມຫຼຸດພົ້ນໃນທີ່ສຸດ

ຄຳສອນທີ່ເປັນຫົວໃຈຂອງພຣະພຸດທະສາສະໜາຄື ຫຼັກທັມປະກອບດ້ວຍ ຫຼັກການ 3 ອຸດົມການ 4 ວິທີການ 6 ດັ່ງນີ້

ຫຼັກການ 3

1, ສັພພະປາປັສສະ ອະກະຣະນັງ,ການບໍ່ເຮັດບາບທັງປວງ ໄດ້ແກ່ການງົດເວັ້ນ ການລົດ ການລະເລີກ ການກະທຳບາບທັງປວງ ເຊິ່ງໄດ້ແກ່ອະກຸສົນລະກັມມະບົດ 10 ທາງແຫ່ງຄວາມຊົ່ວສິບປະການ ອັນເປັນຄວາມຊົ່ວທາງກາຍ ວາຈາ ແລະໃຈດັ່ງນີ້

-ຄວາມຊົ່ວທາງກາຍໄດ້ແກ່ ການຂ້າສັດ ການລັກຊັບ ການປະພຶດຜິດໃນກາມມຄຸນ

-ຄວາມຊົ່ວທາງວາຈາໄດ້ແກ່ ເວົ້າຕວະ ເວົ້າສໍ້ສຽດ ເວົ້າຄຳຫຍາບ ເວົ້າເພີ້ເຈີ້ເຟີ້ຝັນ

-ຄວາມຊົ່ວທາງໃຈໄດ້ແກ່ ການຢາກໄດ້ສົມບັດຂອງຜູ້ອື່ນ ການຜູກພະຍາບາດມາດຮ້າຍ ແລະຄວາມເຫັນຜິດຈາກທຳນອງຄອງທັມ

2,ກຸສະລັສສູປະສັມປະທາ, ການກະທຳກຸສົນໃຫ້ເຖິງພ້ອມ ໄດ້ແກ່ການເຮັດຄວາມດີທຸກຢ່າງ ເຊິ່ງໄດ້ແກ່ການປະຕິບັດຕາມກຸສົນລະກັມມະບົດ 10 ທາງແຫ່ງຄວາມດີສິບປະການ ອັນເປັຮຄວາມດີທາງກາຍ ວາຈາ ແລະໃຈດັ່ງນີ້

-ຄວາມດີທາງກາຍໄດ້ແກ່ ການບໍ່ຂ້າສັດ ບໍ່ທຳຮ້າຍບຽດບຽນຜູ້ອື່ນ ມີແຕ່ຊ່ອຍເຫຼືອເກື້ອກູນ ການໍບໍ່ລັກຊັບສິ່ງຂອງ ຂອງຄົນອື່ນມາເປັນຂອງຕົນເອື້ອເຟື້ອເພື່ອແພ່ ແບ່ງປັນ ການບໍ່ປະພຶດຜິດໃນກາມມະຄຸນ ບໍ່ຫຼົງໄຫຼໃນມົວເມົາ ຮັກດຽວໃຈດຽວ

-ຄວາມດີທາງວາຈາໄດ້ແກ່ ບໍ່ເວົ້າຕວະ ບໍ່ເວົ້າສໍ້ສຽດ ບໍ່ເວົ້າຄຳຫຍາບ ບໍ່ເວົ້າເພີ້ເຈີ້ເຟີ້ຝັນ ເວົ້າແຕ່ຄວາມເປັນຈິງຕາມເຫດຜົນ ເວົ້າແຕ່ຄຳອ່ອນຫວານ ເວົ້າໃຫ້ເກີດຄວາມສາມັກຄີ

-ຄວາມດີທາງໃຈໄດ້ແກ່ ການບໍ່ໂລບມາກຢາກໄດ້ສົມບັດຂອງຜູ້ອື່ນ ມີແຕ່ຄວາມເສຍສະລະ ການບໍ່ຜູກພະຍາບາດມາດຮ້າຍ ມີແຕ່ຄວາມເມດຕາປານີ ປາຖະໜາດີກບຜູ້ອື່ນ ແລະຄວາມບໍ່ເຫັນຜິດຈາກທຳນອງຄອງທັມ ມີຄວາມເຫັນທີ່ຖືກຕ້ອງຕາມຄວາມເປັນຈິງ ເຊັ່ນ ເຮັດດີໄດ້ດີ ເຮັດຊົ່ວໄດ້ຊົ່ວ

3,ສະຈິຕຕະປະຣິໂຍທະປະນັງ, ການກະທຳຈິດໃຈໃຫ້ຜ່ອງໃສ ໄດ້ແກ່ການກະທຳຈິດຂອງຕົນໃຫ້ປາສະຈາກນິວອນ ອັນເປັນເຄື່ອງຂັດຂວາງຈິດໃຈຂອງຕົນບໍ່ໃຫ້ເຂົ້າເຖິງຄວາມສະຫງົບ ມີ 5 ປະການຄື

–ກາມມະສັນທະ ຄວາມພໍໃຈໃນກາມມະຄຸນ 5 ໄດ້ແກ່ຮູບ ສຽງ ກິ່ນ ລົດ ສຳຜັດ

–ພະຍາບາດ ຄວາມອາຄາດພາບາດຈອງກັມຈອງເວນ

–ຖີນະມິດທະ ຄວາມຫົດຫູ່ທໍ້ຖອຍ ງ່ວງເຫງົາຫາວນອນ

–ອຸທັດຈະກຸກຸດຈະ ຄວາມຟຸ່ງສ່ານ ລຳຄານ

–ວິຈິກິດສາ ຄວາມລັງເລສົງໃນ ບໍ່ໝັ້ນໃຈໃນການເຮັດດີເຮັດຊົ່ວວ່າມີຜົນຫຼືບໍ່

ອຸດົມການ 4

1.ຂັນຕີ ປາຣະມັງ ຕະໂປ ຕີຕິກຂາ, ຄວາມອົດທົນເປັນເຄື່ອງເຜົາກິເລດ ເປັນຕະບະ ເຄື່ອງທໍລະມານກິເລດ ເພື່ອຄວາມປະຕິບັດທັມທີ່ເຄັ່ງຄັດ ເລື່ອງທີ່ຕ້ອງອົນທົນມີຫຼາຍຢ່າງເຊັ່ນ

-ອົດທົນຕໍ່ຄວາມທຸກຍາກຕາກຕຳ ອົດທົນຕໍ່ຄວາມຢາກ ຄວາມຫິວ ຄວາມຫິວເປັນໂຣກຢ່າງຍິ່ງ ອົດທົນຕໍ່ຄວາມຮ້ອ ຄວາມໜາວ ຕໍ່ສະພາບດິນຟ້າອາກາດ ແດດຮົ່ມລົມພັດຕ່າງ ໆ

-ອົດທົນຕໍ່ທຸກຂະເວທະນາ ອັນເກີດຈາກການເຈັບໄດ້ໄດ້ພະຍາດ ການເຈັບຫົວມົວຕາ ອັນເປັນເລື່ອງຂອງກົດທຳມະຊາດສັງຂາຣາປຸງແຕ່ງໄປຕາມການເວລາວ ມັນມີເກິດມີແກ່ມີເຈັບ ມີຕາຍ ເປັນທຳມະດາ

-ອົດທົນຕໍ່ການກະທົບກະເທືອນເຊິ່ງກັນແລະກັນ ມັນເປັນທຳມະດາ ຖືກໃຈຄົນໜຶ່ງແຕ່ຂັດໃຈຄົນໜຶ່ງ ຖືກໃສ່ຮ້າຍປ້າຍຄວາມ ມັນເປັນເລື່ອງທຳມະດາ ເຮົາຄວນເຂົ້າໃຈຄົນໃນສັງຄົມ ທຳດີໄວ້ໃຜບໍ່ຍໍກ່າຕາມຊ່າງ ທຳຊົ່ວນັ້ນໃຜຊິຍ້ອງກໍ່ຢ່າທຳ ເມື່ອເຂົາໃສ່ຄວາມ ເຮົາບໍ່ສູ້ ເຮົາບໍ່ໜີ ເຮົາເຮັດດີເລື້ອຍໄປ

-ອົດທົນຕໍ່ອຳນາດຂອງກິເລດຕັນຫາ ເຂົາປ້ອຍດ່າວ່າເລວ ຫຼືເຂົາຍ້ອງຍໍສໍລະເສີນ ເຮົາກໍ່ບໍ່ເຫີມເກີມ ເຮົາເຮັດຜິດພາດ ເຂົາຈິ່ງຕິສິນ ເຮົາເຮັດດີ ເຂົາຈິ່ງຍ້ອງ

2. ນິພພານັງ ປະຣະມັງ ວະທັນຕິ ພຸທທາ, ຜູ້ຮູ້ທັງຫຼາຍກ່າວພຼະນິບພານວ່າເປັນທັມອັນຍິ່ງ ນິບພານຄືການດັບແຫ່ງກິເລດ ເປັນສະພາບທີ່ສຸດແຫ່ງຄວາມສຸກ ເປັນທັມທີ່ຮູ້ໄດ້ສະເພາະຕົນ ຜູ້ໃດປາຖະໜາກໍ່ປະຕິບັດເອງ ອົດທົນຕໍ່ການກຳຈັດກິເລດຕັນຫາ ສ້າງສົມປາຣະມີໄປຈົນທີ່ສຸດຈະຮູ້ໄດ້ເອງ ພຣະພຸດທະເຈົ້າກໍ່ເປັນພຽງຜູ້ບອກທາງເທົ່ານັ້ນ

3. ນະ ຫິ ປັພພະຊິໂຕ ປະຣູປະຄາຕີ, ຜູ້ກຳຈັດສັດອື່ນຢູ່ບໍ່ຊື່ວ່າເປັນບັນພະຊິດເລີຍບັນພະຊິດ ແປວ່ານັກບວດ ຜູ້ອອກບວດນັ້ນງົດເວັ້ນການກຳຈັດ ການຂ້າສັດຕັດຊີວິດ ຂ້າເນື້ອເບືອປານັ້ນສິ່ງທີ່ນັກບວກບໍ່ສົມຄວນເຮັດ ຫຼືຜູ້ທີ່ປາຖະໜາອາຍຸຍືນຍາວກໍ່ຈົ່ງລະເວັ້ນການຂ້າເທີ້ນ ແຕ່ກ່ອນພຼາມທັງຫຼາຍກໍ່ວ່າໂຕເອັງເປັນນັກບວດ ແຕ່ກໍ່ຍັງຂ້າສັດບູຊາຍັນ ບູຊາເທວາອາຮັກຢູ່ ພຣະພຸດທະເຈົ້າວ່ານັ້ນບໍ່ແມ່ນພຣະບໍ່ແມ່ນນັກບວດ ລາວເຮົານັ້ນງົດເລີກມາແຕ່ສະ ໄໝພຣະເຈົ້າໂພທິສາລາດແລ້ວ ພຣະອົງສັງໃຫ້ງົດເລີກການຖືຜີສາງນາງໄມ້ ໃຫ້ຢູ່ໃນສິນໃນທັມທາງພຸຸດທະສາດສະໜາ

4. ນະ ສະມະໂນ ໂຫຕິ ປະຣັງ ວິເຫຖະຍັນໂຕ,ຜູ້ກະທຳສັດອື່ນໃຫ້ລຳບາກຢູ່ບໍ່ຊື່ວ່າເປັນສຳມະນະເລີຍ ຜູ້ມັກສະຫງົບສັນຕິນັ້ນ ບໍ່ຄວນໄປບຽດບຽນຜູ້ອື່ນ ສັດອື່ນໃຫ້ລຳບາກ ບໍ່ຄວນໄປທຳຮ້າຍທີ່ຢູ່ອາໃສ ເຮືອນຮັງຂອງເພິ່ນ ຫຼືວັດຖຸສິ່ງຂອງສ່ວນລວມ ຫາແຕ່ທາງສະດວກສະບາຍໃຫ້ຜູ້ອື່ນດ້ວຍການໃຫ້ອາຫານ ທີ່ຢູ່ ການຂຸດນ້ຳບໍ່ກໍ່ສາລາ ປູກປ່າປູກໄມ້ອັນນີ້ເປັນການເຮັດໃຫ້ສັດອື່ນໄດ້ຮັບຄວາມສຸກ

ວິທີການ 6

1.ອະນູປະວາໂທ ການບໍ່ວ່າຮ້າຍ ເມື່ອເຮົາຈະເຮັດສິ່ງໃດສິ່ງໜຶ່ງທີ່ເປັນປະໂຫຍດໃຫ້ແກ່ຕົນແລະສັງຄົມ ປະເທດຊາດ ສາດສະໜາ ຂໍ້ນີ້ສຳຄັນ ການເວົ້າຈາອ່ອນຫວານມີເນື້ອຫາສາລະ ບໍ່ຂົ່ມເພິ່ນຍໍໂຕ ບໍ່ໂຈມຕີລັດທິອື່ນ ສາດສະໜາອື່ນ ແຕ່ໃຫ້ບອກວ່າສາສະໜາພຸດນີ້ດີຢ່າງນີ້ ມີຄຳສອນຢ່າງນີ້

2.ອະນູປະຄາໂຕ ການບໍ່ທຳຮ້າຍ ຢ່າໄປທຳຮ້າຍຄົນທີ່ບໍ່ເຫັນດີນຳ ຫລືໃຊ້ກຳລັງບັງຄັບໃຫ້ເຂົາມາສົນໃຈເຮົາ ປະຫວັດສາດພຣະພຸດທະສາດສະໜານັ້ນ ເປັນສາດສະໜາດຽວທີ່ບໍ່ມີສົງຄາມທາງສາດສະໜາ ບໍ່ຕໍ່ສູ້ກັນເອງ ບໍ່ຕໍ່ຕ້ານກັບລັດທິຫຼັກການໃດ ແມ່ນແຕ່ທາງການບ້ານການເມືອງ ຍ້ອນຄຳສອນຂໍ້ນີ້ເຮັດໃຫ້ສາດສະໜາພຸດໝັ້ນຄົງມາທຸກວັນ

3.ປາຕິໂມກເຂ ຈະ ສັງວະໂຣ ການສັງລວມໃນປາຕິໂມກ ງົດເວັ້ນຂໍ້ທີ່ຫ້າມ ເຮັດຕາມຂໍ້ທີ່ສັ່ງ ສິນຂອງພຣະກໍ່ 227 ຂໍ້ ພໍ່ອອກແມ່ອອກກໍ່ສິນ 5 ສິນ 8 ມີມາລະຍາດ ສຳລວມ ຕະຫຼອດເຖິງການປະຕິບັດຕາມກົດໝາຍບ້ານເມືອງ ປະເພນີອັນດີງາມຂອງບ້ານເມືອງ

4.ມັຕຕັນຍຸຕາ ຈະ ພັຕຕັສມິງ ຮູ້ຈັກປະມານໃນການກິນ ການບໍ່ລິໂພກ ການໃຊ້ສອຍສິ່ງຂອງຕ່າງ ໆ ບໍ່ຟູ້ມເຟີ້ ຮູ້ຈັກຄຸນຄ່າແທ້ ຄຸນຄ່າທຽມໃນສິ່ງຂອງຕ່າງ ໆ ບໍ່ເຫັນແກ່ແຕ່ກິນ ເຫັນແກ່ລາບສັກກາລະຈົນລືມເຮັດຕາມໜ້າທີ່ຂອງຕົນ

5.ປັນຕັນຈະ ສະຍະນາສະນັງ ການນັ່ງການນອນ ໃນທີ່ອັນສະຫງົບ ຢູ່ຕາມຄວາມພໍປະມານບໍ່ຫຼູຫຼາ ພຣະສົງນັ້ນພຣະພຸດທະເຈົ້າອະນຸຍາດໃຫ້ນອນໃນກ້ອງຕົ້ນໄມ້ ໃຫ້ຖືເປັນນິໃສ ຖ້າເຮົາຖືຄະຕິວ່າກິນເພື່ອອີ່ມ ນອນເພື່ອຫຼັບແລ້ວຢູ່ໃສກໍ່ສະບາຍ

6.ອະທິຈິຕເຕ ຂະ ອາໂຍໂຄ ການປະກອບຄວາມພຽນ ເຝິກຈິດຂອງຕົນໃຫ້ສະຫງົບ ໃຫ້ບໍລິສຸດ ມີສຸຂະພາບ ມີຄຸນນະພາບ ເພື່ອນຳໄປສູ່ການບັນລຸມັກຜົນນິບພານ

– ສຳລັບທີ່ມາຂອງຄຳວ່າບຸນເຂົ້າຈີ່ ມີທີ່ມາດັ່ງນີ້

– ສະໄໝພຣະພຸດທະເຈົ້າຊົງພຣະຊົນຢູ່ນັ້ນ ມີນາງທາສີທຸກໄຮ້ເຂັນໃຈໄຮ້ຊັບອັບປັນຍາຄົນໜຶ່ງ ຊື່ ປຸນນະທາສີ ນຶກເຫັນວ່າຕົນເອງນີ້ ເປັນຄົນທຸກໃນຊາດນີ້ ອາດບໍ່ເຄີຍທຳບຸນມາກ່ອນໃນຊາດທີ່ແລ້ວ ຄວນເຮົາຈະຂົນຂວາຍ ຫາຂອງທານໃຫ້ໄດ້ແຕ່ນາງກໍຈົນປັນຍາທີ່ຈະຫາຂອງທານ ໄປທານແກ່ພຣະສົງ ພຽງແຕ່ລ້ຽງຊີວິດຕົນເອກໍຍັງບໍ່ມີອັນຈະກິນ ນາງວັນນັ້ນ ນາງໄດ້ເອົາເຂົ້າໜຽວໜຶ່ງປັ້ນ ໄປເກືອກກັບຮຳອ່ອນ ແລ້ວກໍເອົາມາຈີ່ໄຟ ແລ້ວກໍພົກໃສ່ຫົວສິ້ນໄວ້, ແລ້ວກໍອອກໄປເຮັດວຽກໃຫ້ເຈົ້າ ນາຍ ໃນຂະນະທີ່ກຳລັງເດີນທາງໄປຢູ່ນັ້ນ ນາງເຫັນຄົນສ່ວນຫຼາຍທບຸນກັນໃນວັນມາຄະ ນາງກໍໄດ້ແຕ່ຄິດຢາກທຳບຸນ ກໍຫາວິທີຄິດເຮັດຢູ່ກໍບໍ່ເຫັນ ທາງ ໃນຂະນະນັ້ນເອງພຣະພຸດທະເຈົ້າຮູ້ໂດຍພຣະຍານ ຂອງພຣະອົງແລ້ວວ່າ “ນາງທາສີຄົນນີ້ ຈັກໄດ້ສິ້ນຊີວິດໃນວັນນີ້ ດ້ວຍແຮງສັດທາຂອງນາງທີ່ຢາກທຳບຸນ ຫາກນາງໄດ້ທຳບຸນ ກໍຈະໄດ້ໄປເກີດໃນສະຫວັນ ພຣະອົງຈຶ່ງສະເດັດໄປໂຜດນາງ ຫາກໄດ້ທານເຂົ້າຈີ່ກ້ອນໜຶ່ງ ກໍຈະມີອານິສົງ ນຳຕົນຂື້ນສູ່ຫວັນ” ແລະແລ້ວທັນໃດນັ້ນພຣະພຸດທະເຈົ້າກໍສະເດັດມາ ເຊິ່ງໜ້ານາງ ທາງຕົກໃຈ ເຫັນພຣະພຸດທະເຈົ້າກໍາລັງເດິນບິນທະບາດ ນາງກໍຄິດວ່າພຣະພຸດທະເຈົ້າກໍຕ້ອງການອາຫານ ນາງກໍ ຄິດໄດ້ວ່າອາຫານເຮົາມີເຂົ້າຈີປັ້ນດຽວ ຫາກເຮົາທານເຮົາກໍຫິວ ແຕ່ຖ້າເຮົາທານໃຫ້ພຣະພຸດທະເຈົ້າ ເຮົາກໍຈັກໄດ້ບຸນ ເກີດຊາດໜ້າເຮົາຈະບໍຣິບູນດ້ວຍໂພຄະຊັບ ນາງຈຶ່ງຄິດວ່າ “ເຖິງຫິວໃນຊາດນີ້ ແຕ່ຊາດໜ້າເຮົາຈະບໍ່ຫິວ” ຈຶ່ງຕັດສິນໃຈເອົາກ້ອນເຂົ້າຈີ່ໃນພົກສິ້ນນາງຖວາຍສົງ ລົງໄປໃນບາດພຣະພຸດທເຈົ້າ ພຣະພຸດທະເຈົ້າ ຮັບແລ້ວໃຫ້ພອນນາງ ເມື່ອນາງໃຫ້ທານໄປແລ້ວກໍດີໃຈ ປິຕິໂສມະນັດ ໃນຂອງທານຕົນ ແຕ່ເມື່ອພຣະພຸດທະເຈົ້າຮັບແລ້ວ ນາງຄິດວ່າພຣະອົງຈະສັນຂອງເຮົາບໍນໍ ນາງຄິດເຊັ່ນນັ້ນ ພຣະພຸດທະອົງກໍຊົງຮູ້ຄວາມຄິດນາງ ຈຶ່ງສະໜອງສັດທານາງທາສີຄົນນັ້ນໃຫ້ບໍຣິບູນ ພຣະອົງກໍສະເດັດເຂົ້າໄປປະທັບນັ່ງ ທີ່ຕ້ອງຕົ້ນໄມ້ຂ້າງທາງນັ້ນ ນາງທາສີເຫັນແລ້ວກໍຊື່ນໃນ ກໍກັບເມື່ອຢູ່ທີ່ຢູ່ຂອງຕົນດ້ວຍຄວາມປິຕິ ວັນນັ້ນເອງ ນາງກໍໄດ້ມໍນະກັມຕາມກຳນົດ ພຣະພຸດທະອົງຊາບແລ້ວກໍເທດສະໜາບອກພິກຂູສົງວ່າ “ນາງທາສິຄົນນັ້ນໄດ້ໄປເກີດ ເປັນນາງເທວະດາ ຊື່ປຸນນະເທບພະດາ” ຢູ່ຊັ້ນຕາວະຕິງສາ.

– ນັບແຕ່ນັ້ນມາ ຊາວພຸດຈຶ່ງນະຍົມເອົາເຂົ້າຈີ່ມາທານໃນວັນເດືອນ ໓ ເພັງນີ້.

ກັມກຳນົດຊີວິດ

ກັມກຳນົດຊີວິດ

ສະໄໝໜຶ່ງ ພຣະຜູ້ມີພຣະພາກເຈົ້າປະທັບຢູ່ທີ່ປາວາຣິກອັມພະວັນ ໃກ້ເມືອງນາລັນທາ, ຄັ້ງນັ້ນ ນາຍບ້ານນາມວ່າ ອະສິພັນທະກະບຸດ ເຂົ້າໄປຫາພຣະຜູ້ມີພຣະພາກເຈົ້າເຖິງທີ່ປະທັບ ກຣາບອະພິວາທແລ້ວນັ່ງໃນທີ່ຄວນສ່ວນຂ້າງໜຶ່ງ ແລ້ວໄດ້ທູນຖາມພຣະຜູ້ມີພຣະພາກເຈົ້າວ່າ:

ຂ້າແຕ່ພຣະອົງຄ໌ຜູ້ຈະເຣີນ ! ພວກພຣາມຊາວປັດສາພູມ ມີໂຖນ້ຳຕິດໂຕ ປະດັບພວງມາໄລ ອາບນ້ຳທຸກເຊົ້າຄ່ຳ ບູຊາໄຟ ພຣາມເຫລົ່ານັ້ນຊື່ວ່າ ກະທຳສັດທີ່ຕາຍແລ້ວໃຫ້ເປັນຂຶ້ນ ໃຫ້ຮູ້ຮອບ ຊວນໃຫ້ເຂົ້າສະຫວັນ. ຂ້າແຕ່ພຣະອົງຄ໌ຜູ້ຈະເຣີນ ກໍພຣະຜູ້ມີພຣະພາກອະຣະຫັນຕະສັມມາສັມພຸທທະເຈົ້າຊົງສາມາດກະທຳໃຫ້ສັດໂລກທັງໝົດເມື່ອຕາຍແລ້ວ ເຂົ້າເຖິງສຸຄະຕິໂລກສະຫວັນໄດ້ບໍ ຂ້ານ້ອຍ?

ພຣະຜູ້ມີພຣະພາກເຈົ້າຕຣັສຕອບວ່າ:

ຄາມະນິ ! ຖ້າຢ່າງນັ້ນ ເຮົາຈັກຢ້ອນຖາມທ່ານໃນຂໍ້ນີ້ ບັນຫາຄວນແກ່ທ່ານດ້ວຍປະການໃດ ທ່ານຈົ່ງພະຍາກອນບັນຫາຂໍ້ນັ້ນດ້ວຍປະການນັ້ນ. ທ່ານຈະສຳຄັນຄວາມຂໍ້ນີ້ວ່າແນວໃດ? ຄື:

ບຸກຄົນໃນໂລກນີ້ ຂ້າສັດ ລັກຊັບ ປະພຶດຜິດໃນກາມ ເວົ້າຕົວະ ເວົ້າສຽດສີ ເວົ້າຄຳຫຍາບ ເວົ້າຄຳທີ່ບໍ່ມີສາຣະປະໂຫຍດ ເຕັມໄປດ້ວຍອະພິຊຊາ (ຄວາມໂລບຢາກໄດ້ຂອງເຂົາ), ມີຈິດພະຍາບາທ, ມີຄວາມເຫັນຜິດ, ໝູ່ມະຫາຊົນມາປະຊຸມກັນແລ້ວກໍສູດອ້ອນວອນ ສັນລະເສີນ ປະນົມມືເດີນວຽນຮອບຜູ້ນັ້ນວ່າ ຂໍບຸກຄົນນີ້ເມື່ອຕາຍໄປຈົ່ງເຂົ້າເຖິງສຸຄະຕິໂລກສະຫວັນ; ທ່ານຈະສຳຄັນຄວາມຂໍ້ນັ້ນວ່າແນວໃດ ບຸກຄົນນັ້ນ ເມື່ອຕາຍໄປຈະເຂົ້າເຖິງສຸຄະຕິໂລກສະຫວັນເພາະເຫດແຫ່ງການອ້ອນວອນ ເພາະເຫດແຫ່ງການສັນລະເສີນ ຫລືເພາະເຫດແຫ່ງການປະນົມມືເດີນວຽນຮອບດັ່ງນີ້ຫລື?

ບໍ່ເປັນເຊັ່ນນັ້ນ ຂ້ານ້ອຍ ! ຄາມະນິຕອບ.

ຄາມະນິ ! ປຽບເໝືອນບຸກຄົນໂຍນຫີນກ້ອນໜາແລະໃຫຍ່ລົງໄປໃນແມ່ນ້ຳເລິກ ແລະມີໝູ່ມະຫາຊົນມາປະຊຸມກັນແລ້ວກໍສູດອ້ອນວອນ ສັນລະເສີນ ປະນົມມືເດີນວຽນຮອບຫີນນັ້ນວ່າ ຂໍກ້ອນຫີນຈົ່ງຟູຂຶ້ນເຖີດ ຂໍກ້ອນຫີນຈົ່ງຂຶ້ນເທິງບົກເຖີດ. ທ່ານຈະສຳຄັນຄວາມຂໍ້ນັ້ນວ່າແນວໃດ? ກ້ອນຫີນນັ້ນຈະຟູຂຶ້ນ ລອຍຂຶ້ນ ຫລືຂຶ້ນເທິງບົກເພາະເຫດແຫ່ງການອ້ອນວອນ ເພາະເຫດແຫ່ງການສັນລະເສີນ ຫລືເພາະເຫດແຫ່ງການປະນົມມືເດີນວຽນຮອບດັ່ງນີ້ຫລື?

ບໍ່ເປັນເຊັ່ນນັ້ນ ຂ້ານ້ອຍ ! ຄາມະນິຕອບ.

ຄາມະນິ ! ສັນນັ້ນເໝືອນກັນ ບຸກຄົນໃດຂ້າສັດ ລັກຊັບ ປະພຶດຜິດໃນກາມ ເວົ້າຕົວະ ເວົ້າສຽດສີ ເວົ້າຄຳຫຍາບ ເວົ້າຄຳທີ່ບໍ່ມີສາຣະປະໂຫຍດ ເຕັມໄປດ້ວຍອະພິຊຊາ(ຄວາມໂລບຢາກໄດ້ຂອງເຂົາ), ມີຈິດພະຍາບາທ, ມີຄວາມເຫັນຜິດ, ໝູ່ມະຫາຊົນມາປະຊຸມກັນແລ້ວກໍສູດອ້ອນວອນ ສັນລະເສີນ ປະນົມມືເດີນວຽນຮອບຜູ້ນັ້ນວ່າ ຂໍບຸກຄົນນີ້ເມື່ອຕາຍໄປຈົ່ງເຂົ້າເຖິງສຸຄະຕິໂລກສະຫວັນກໍຈິງ ແຕ່ບຸກຄົນນັ້ນເມື່ອຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ.

ຄາມະນິ ! ທ່ານຈະສຳຄັນຄວາມຂໍ້ນີ້ວ່າແນວໃດ? ຄື:ບຸກຄົນໃນໂລກນີ້ ເວັ້ນຈາກການຂ້າສັດ ເວັ້ນຈາກການລັກຊັບ ເວັ້ນຈາກການປະພຶດຜິດໃນກາມ ເວັ້ນຈາກການເວົ້າຕົວະ ເວັ້ນຈາກການເວົ້າສຽດສີ ເວັ້ນຈາກການເວົ້າຄຳຫຍາບ ເວັ້ນຈາກການເວົ້າຄຳທີ່ບໍ່ມີສາຣະປະໂຫຍດ ບໍ່ຫລາຍໄປດ້ວຍອະພິຊຊາ(ຄວາມໂລບຢາກໄດ້ຂອງເຂົາ), ບໍ່ມີຈິດພະຍາບາທ, ມີຄວາມເຫັນຖືກຕ້ອງ, ໝູ່ມະຫາຊົນມາປະຊຸມກັນແລ້ວກໍສູດອ້ອນວອນ ສັນລະເສີນ ປະນົມມືເດີນວຽນຮອບຜູ້ນັ້ນວ່າ ຂໍບຸກຄົນນີ້ເມື່ອຕາຍໄປຈົ່ງເຂົ້າເຖິງອະບາຍ ທຸຄະຕິ ວິນິບາຕ ນະຣົກ; ທ່ານຈະສຳຄັນຄວາມຂໍ້ນັ້ນວ່າແນວໃດ ບຸກຄົນນັ້ນ ເມື່ອຕາຍໄປຈະເຂົ້າເຖິງອະບາຍ ທຸຄະຕິ ວິນິບາຕ ນະຣົກ ເພາະເຫດແຫ່ງການອ້ອນວອນ ເພາະເຫດແຫ່ງການສັນລະເສີນ ຫລືເພາະເຫດແຫ່ງການປະນົມມືເດີນວຽນຮອບດັ່ງນີ້ຫລື?

ບໍ່ເປັນເຊັ່ນນັ້ນ ຂ້ານ້ອຍ ! ຄາມະນິຕອບ.

ຄາມະນິ ! ປຽບເໝືອນບຸກຄົນລົງໄປໃນແມ່ນ້ຳເລິກ ແລ້ວທຸບໝໍ້ເນີຍໃສຫລືໝໍ້ນ້ຳມັນ ກ້ອນກວດຫລືກ້ອນຫີນທີ່ມີຢູ່ໃນໝໍ້ນັ້ນຍ່ອມຈົມລົງ ສ່ວນເນີຍໃສຫລືນ້ຳມັນທີ່ມີຢູ່ໃນໝໍ້ນັ້ນຍ່ອມລອຍຂຶ້ນ ແລະມີໝູ່ມະຫາຊົນມາປະຊຸມກັນແລ້ວກໍສູດອ້ອນວອນ ສັນລະເສີນ ປະນົມມືເດີນວຽນຮອບເນີຍໃສ ຫລືນ້ຳມັນນັ້ນວ່າ ຂໍເນີຍໃສແລະນ້ຳມັນຈົ່ງຈົມລົງເຖີດ ຂໍເນີຍໃສແລະນ້ຳມັນຈົ່ງມຸດລົງເຖີດ ຂໍເນີຍໃສແລະນ້ຳມັນຈົ່ງຈົມລົງໄປໃນພື້ນນ້ຳເຖີດດັ່ງນີ້; ທ່ານຈະສຳຄັນຄວາມຂໍ້ນີ້ວ່າແນວໃດ? ເນີຍໃສແລະນ້ຳມັນຈະຈົມລົງ ມຸດລົງ ຈົມລົງໄປໃນພື້ນນ້ຳເພາະເຫດແຫ່ງການອ້ອນວອນ ເພາະເຫດແຫ່ງການສັນລະເສີນ ຫລືເພາະເຫດແຫ່ງການປະນົມມືເດີນວຽນຮອບດັ່ງນີ້ຫລື?

ບໍ່ເປັນເຊັ່ນນັ້ນ ຂ້ານ້ອຍ ! ຄາມະນິຕອບ.

ຄາມະນິ ! ສັນນັ້ນເໝືອນກັນ ບຸກຄົນໃດເວັ້ນຈາກການຂ້າສັດ ເວັ້ນຈາກການລັກຊັບ ເວັ້ນຈາກການປະພຶດຜິດໃນກາມ ເວັ້ນຈາກການເວົ້າຕົວະ ເວັ້ນຈາກການເວົ້າສຽດສີ ເວັ້ນຈາກການເວົ້າຄຳຫຍາບ ເວັ້ນຈາກການເວົ້າຄຳທີ່ບໍ່ມີສາຣະປະໂຫຍດ ບໍ່ຫລາຍໄປດ້ວຍອະພິຊຊາ, ບໍ່ມີຈິດພະຍາບາທ ມີຄວາມເຫັນຖືກຕ້ອງ, ໝູ່ມະຫາຊົນມາປະຊຸມກັນແລ້ວກໍສູດອ້ອນວອນ ສັນລະເສີນ ປະນົມມືເດີນວຽນຮອບຜູ້ນັ້ນວ່າ ຂໍບຸກຄົນນີ້ເມື່ອຕາຍໄປຈົ່ງເຂົ້າເຖິງອະບາຍ ທຸຄະຕິ ວິນິບາຕ ນະຣົກກໍຈິງ ແຕ່ບຸກຄົນນັ້ນເມື່ອຕາຍໄປຍ່ອມເຂົ້າເຖິງສຸຄະຕິໂລກສະຫວັນ.

ເມື່ອພຣະຜູ້ມີພຣະພາກເຈົ້າຕຣັສຢ່າງນີ້ແລ້ວ ນາຍບ້ານນາມວ່າ ອະສິພັນທະກະບຸຕໄດ້ກຣາບທູນພຣະຜູ້ມີພຣະພາກເຈົ້າວ່າ

ຂ້າແຕ່ພຣະອົງຄ໌ຜູ້ຈະເຣີນ, ພຣະທັມມະເທສນາຂອງພຣະອົງຄ໌ແຈ່ມແຈ້ງຫລາຍ, ຂ້າແຕ່ພຣະອົງຄ໌ຜູ້ຈະເຣີນ, ພຣະທັມມະເທສນາຂອງພຣະອົງຄ໌ແຈ່ມແຈ້ງຫລາຍ, ພຣະຜູ້ມີພຣະພາກເຈົ້າຊົງປະກາດທັມໂດຍອະເນກປະຣິຍາຍ ປຽບເໝືອນຫງາຍຂອງທີ່ຂວ້ຳ ເປີດຂອງທີ່ປິດ ບອກທາງແກ່ຄົນຫລົງທາງ ຫລືສ່ອງປະທີບໄວ້ໃນທີ່ມືດ ດ້ວຍຫວັງວ່າ ຄົນມີຈັກຂຸຈັກເຫັນຮູບ ດັ່ງນີ້; ຂ້າແຕ່ພຣະອົງຄ໌ຜູ້ຈະເຣີນ ຂ້ານ້ອຍຂໍເຖິງພຣະຜູ້ມີພຣະພາກເຈົ້າ ກັບທັງພຣະທັມແລະພຣະພິກຂຸສົງຄ໌ວ່າ ເປັນສະຣະນະ ຂໍພຣະຜູ້ມີພຣະພາກເຈົ້າຊົງຈຳຂ້ານ້ອຍໄວ້ວ່າ ເປັນອຸປາສົກຜູ້ເຖິງສະຣະນະຕະຫລອດຊີວິດ ຕັ້ງແຕ່ວັນນີ້ເປັນຕົ້ນໄປ.

ສຸຕຕັນຕະປິດົກ ສັງຍຸຕຕະນິກາຍ ສະລາຍະຕະນະວັກ ພາສາໄທ ສະບັບຫລວງ ໑໘/໓໑໙-໓໒໒/໕໙໘-໖໐໒